تازہ حملوں میں خواتین اور بچوں سمیت 37 فلسطینی شہید

غزہ: صیہونی فوج نے آج بھی غزہ سٹی میں شدید حملے جاری رکھے ہوئے ہیں۔ تازہ حملوں میں خواتین اور بچوں سمیت سینتیس فلسطینی شہید اور درجنوں زخمی ہوگئے۔
اسرائیلی جنگی طیاروں نے صبح سویرے غزہ سٹی میں دیر البلاح ۔ خان یونس۔ الصابرہ اور نصیرات میں فضائی حملے کئے جس میں مکانات اور خیموں کو نشانہ بنایا گیا۔ اسپتالوں کے اطراف میں بھی گولہ باری کی اور ڈرون سے میزائل داغے گئے۔ اسرائیلی گولہ باری سے الرنتیسی چلڈرن اینڈ آئی اسپتال غیر فعال ہوگیا۔
جنگی طیاروں نے آج دوسرے دن بھی القدس اوپن یونیورسٹی کے قریب شہریوں کے گھروں پر بھی شدید حملے کیے۔
ادھر حماس کے عسکری ونگ القسام بریگیڈز نے اسرائیلی قیدی علون اوہل کی ویڈیو جاری کر دی ہے۔ یرغمالی نے کہا کہ میری قید نیتن یاہو کی ضد کے باعث طویل ہو گئی ہے، امریکی ایلچی وٹکوف کو نیتن یاہو کو ہمیں قتل کرنے سے روکنا چاہیے.