Raza Musani 
ہالی وڈ : فلسطینیوں کی نسل کشی پر دنیا بھر کے تیرا سو سے زائد فلم سازوں، اداکاروں اور انڈسٹری سے وابستہ شخصیات نے اسرائیلی فلمی اداروں کا بائیکاٹ کردیا۔ فلم سازوں، اداکاروں، فلم انڈسٹری کے کارکنوں اور اداروں نے مشترکہ بیان میں کہاہےکہ اسرائیلی ادارے فلسطینی عوام کے خلاف نسل کشی اور نسل پرستی میں ملوث ہیں۔
بیان میں کہا گیاہےکہ موجودہ حالات میں جہاں ہماری حکومتیں غزہ میں قتل عام کو ممکن بنا رہی ہیں، ہمیں اس بے لگام ہولناکی میں ملوث ہونے سے بچنے کے لیے ہر ممکن کوشش کرنی چاہیے۔
بین الاقوامی عدالت انصاف (آئی سی جے) کے فیصلے کو یاد کرتے ہوئے کہ غزہ میں نسل کشی کا ممکنہ خطرہ ہے، بیان میں کہا گیا کہ تمام لوگوں کے لیے آزادی ایک گہرا اخلاقی فرض ہے جسے ہم میں سے کوئی نظر انداز نہیں کر سکتا۔ بیان پر دستخط کرنیوالوں میں آسکر، بی اے ایف ٹی اے، ایمی اور کانز ایوارڈ یافتہ فنکار بھی شامل ہیں۔
