بلوچستان میں چھاؤنی پر حملے اور جھڑپوں میں 12 فوجی شہید

ژوب: پاکستان کے صوبے بلوچستان میں دہشت گردوں کے چھاؤنی پر حملے اور جھڑپوں میں بارہ فوجی شہید ہوگئے۔ بلوچستان کے علاقے ژوب میں گذشتہ روز دہشت گردوں نے فوجی چھاؤنی پر دھاوا بول دیا۔ دہشت گردوں نے چھاؤنی میں گھسنے کی کوشش کی جہاں ڈیوٹی پر موجود فوجیوں نے دہشت گردوں کو روک دیا۔ فائرنگ کے تبادلے میں چار فوجی موقع پر ہی شہید ہوگئے جبکہ پانچ زخمی اسپتال میں جام شہادت نوش کرگئے۔ جھڑپوں میں تین دہشت گرد مارے گئے جبکہ دو دہشت گردوں کو کلیئرنس آپریشن کے دوران ہلاک کردیا گیا۔ ادھر سوئی میں بھی فوج اور دہشت گردوں کے درمیان جھڑپ ہوئی. فائرنگ کے تبادلے میں 3 فوجی جوان شہید جبکہ 2 دہشت گرد ہلاک ہوگئے۔ پاک فوج کے ترجمان کا کہنا ہے کہ سکیورٹی فورسز بلوچستان کا امن تباہ کرنے کی ہر گھناؤنی کوشش ناکام بنانے کے لیے پرعزم ہیں۔