ملک بھر میں یوم عاشور عقیدت و احترام سے منایا گیا

چھوٹے بڑے مختلف شہروں میں شبیہ ذوالجناح، کے جلوس نکالے گئے جو اپنے مقرر کردہ راستوںسے ہوتے ہوئے اپنی اپنی منزل پر اختتام پذیر ہوئے
 جلوسوں کی سخت نگرانی ، ہزاروں اہلکار تعینات ،کراچی سمیت مختلف شہروں میں موبائل فون سروس معطل رہی،کراچی میں بارش کے باوجود عزاداری جاری رہی
 کراچی (نیو زڈیسک ) نواسہ رسول حضرت امام حسین علیہ السلام اور ان کے ساتھیوں کی لازوال قربانیوں کی یاد میں ملک بھر میں یوم عاشور عقیدت و احترام سے منایا گیا،ملک بھر کے چھوٹے بڑے مختلف شہروں میں شبیہ ذوالجناح، کے جلوس نکالے گئے جو اپنے مقرر کردہ راستوںسے ہوتے ہوئے اپنی اپنی منزل پر اختتام پذیر ہوئے ، کراچی کا محرم الحرام کا مرکزی جلوس نشتر پارک سے برآمد ہوا، جلوس سے پہلے علامہ شہنشاہ حسین نقوی نے مجلس پڑھائی، جلوس مقررہ راستوں سے ہوتا ہوا امام بارگاہ ایرانیاں حسینیاں پر پہنچ کر اختتام پزیر ہوا، لاہور میں یوم عاشور کا مرکزی جلوس نثار حویلی اندرون موچی گیٹ سے برآمد ہوا اور روایتی راستوں سے ہوتا ہوا کربلا گامے شاہ پہنچ کر اختتام پذیر ہوااس کے علاوہ پشاور، راولپنڈی، ملتان، حیدر آباد، سکھر، بنوں اور دیگر شہروں میں بھی محرم الحرام کے جلوس روایتی راستوں سے ہوتے ہوئے اختتام پذیر ہوئے، محرم الحرام کے جلوسوں کی سخت نگرانی کی گئی اور جلوسوں کی نگرانی پر ہزاروں سیکیورٹی اہلکاروں کو تعینات کیا گیا ،محرم الحرام کے جلوسوں کی مناسبت سے سیکیورٹی کے پیش نظر کراچی، کوئٹہ، لاہور، راولپنڈی اور جہلم سمیت مختلف شہروں میں موبائل فون سروس معطل رہی جس کی وجہ سے شہریوں کو شدید مشکلات کا سامناکرنا پڑا،کراچی میں سات محرم کو شدید طوفانی بارشوں کے باوجود عزاداری کا سسلسلہ منقطع نہیں ہوا، شہر کی مختلف امام بارگاہوں اور اطراف میں بارش کے باعث پانی کھڑا ہوگیا تھا تاہم عزاداروں اور اسکاوٹس نے اپنی مدد آپ کے تحت صفائی کا انتظام کیا اور جلوس برآمد کئے گئے