Ilyas اسرائیل سے امن معاہدہ فلسطینی ریاست کی قیمت پر نہیں کیا گیا،اماراتی ولی عہد کا دلاسہ
ابوظہبی (نیوز ڈیسک) متحدہ عرب امارات اور اسرائیل نے تجارتی، سفارتی اور طبی میدانوں میں بھر پور تعاون شروع کردیا ، تل ابیب سے پہلی پرواز مسافروں کو لے کر ابوظہبی پہنچی امریکی صدر ڈونلڈ ٹرمپ کے داماداور مشیر جیرڈ کوشنر سمیت اعلیٰ عہدیداروں کے ساتھ اسرائیل کا اعلیٰ سطح کا وفد یو اے ای پہنچا، وفد نے تعلقات کی بحالی کیلئے حتمی مذاکرات کئے ، ادھر عرب امارات کے ولی عہد شیخ خلیفہ بن زاید النہیان نے اسرائیل کا معاشی بائیکاٹ ختم کرنے کا اعلان کرتے ہوئے اسرائیلی اداروں کے ساتھ معاہدے کرنے کی اجازت دیدی، اسرائیلی اسٹیٹ کمپنیوں اور اداروں نے امارات کی پراپرٹی مارکیٹ پر قبضے کی تیاریاں کرلی ہیں، تاکہ امارات میں اپنی کاروباری جڑوں کو مضبوط بنا کر زیادہ سے زیادہ منافع کمایا جائے ، دو ہفتوں کے دوران 50 سے زائد اسرائیلی سرمایہ کاروں اور کمپنیوں نے امارات میں پراپرٹی کا کاروبار کرنے کے سلسلے میں رابطہ کر کے معلومات لی ہیں ، ولی عہد محمد بن زید النہیان نے دلاسہ دیتے ہوئے کہا ہے کہ متحدہ عرب امارات اب بھی فلسطینی ریاست کے قیام کیلئے پرعزم ہے اور اسرائیل سے امن معاہدہ اس کی قیمت پر نہیں کیا گیا ، فیصلے کا مقصد امن کیلئے مواقع پیدا کرنا ہے ، امن ایک اسٹریٹیجک آپشن ہے
