ایران نے قاسم سلیمانی اور ابومہدی میزائل بھی تیار کرلئے

میزائل 14سو اور ہزار کلومیٹر تک مار کرسکتے ہیں ،روحانی نے رونمائی کی
تہران (نیوز ڈیسک)ایرانی صدر ڈاکٹر حسن روحانی نے دفاعی صنعتوں کے قومی دن کے موقع پر متعدد دفاعی منصوبوں کی رونمائی کردی، حسن روحانی نے ویڈیو کانفرنس کے ذریعے ایران کی ڈرون ٹیکنالوجی نمائش، قومی ٹربوجیٹ انجن ’اوج‘، ’شہید قاسم سلیمانی‘ بیلسٹک میزائل، شہید ’ابو مہدی‘ کروز میزائل اور لائٹ ٹربو فین انجن ’جہش‘ کی رونمائی کی، ایوی ایشن انڈسٹریز کے عہدیدار نے بتایا کہ نمائش میں کرار، مہاجر، فطرس، ابابیل اور صادق قسم کے مختلف النوع ڈرون طیاروں کی نمائش کی جا رہی ہے ،کرار نامی ڈرون طیارے اسٹریٹیجک نوعیت کے ہیں اور انہیں دفاعی اور عسکری دونوں سطح پر استعمال کیا جا سکتا ہے، اس موقع پر حاج قاسم سلیمانی بیلسٹک میزائل کی بھی رونمائی کی گئی جو ریڈار کی رینج میں آئے بغیر چودہ سو کلومیٹر کی حدود میں طے شدہ ہدف کو پوری اکیوریسی کے ساتھ نشانہ بنانے کی صلاحیت رکھتا ہے،ابومہدی کروز میزائل کا تعلق سومار اور ہویزہ میزائلوں کی فیملی سے ہے اور یہ ایک ہزار کلومیٹر دور تک مار کرنے کی صلاحیت رکھتا ہے، یہ میزائل تین ہزار ٹن وزنی بحری جہازوں کو تباہ کر سکتا ہے۔