پاکستان بڑی تباہی سے بچ گیا،اسلحہ وبارود کا ڈھیرپکڑاگیا

 وہاڑی میں لشکر جھنگوی کا دہشت گرد 35 پستول، 3 رائفل،نائن ایم ایم کے 18 پستول اور 26 ہزار سے زائد گولیوں کے ساتھ پکڑا گیا،ملزم اسلحہ سپلائی کرتا تھا
 خیبرپختونخوا میں دہشت گردوں کی نشاندہی پر جمرود سے 50 کلوگرام بارودپکڑا گیا، لوئردیر میں فورسز کے خفیہ آپریشن کے دوران 3دہشت گرد مارے گئے
 کراچی(نیوز ڈیسک) سیکورٹی اداروں نے ملک میں تباہی پھیلانے کی سازش ناکام بنادی اور اسلحہ وبارود کا ذخیر ہ برآمد کرلیا، جبکہ تین دہشت گردوں کو ہلاک کردیا گیا، پنجاب پولیس نے جنوبی پنجاب اسمگل ہونے والا بڑی تعداد میں اسلحہ پکڑ لیا ،ملزم کو فیملی سمیت گرفتار کرلیا گیا ، ملزم کے قبضے سے 35 پستول، 3 رائفل، 7 گن اور 9 ایم ایم کے 18 پستول اور 26 ہزار سے زائد گولیاں و کارتوس بھی برآمد ہوئے ہیں، اور ملزم نے یہ اسلحہ جنوبی پنجاب کے مختلف اضلاع میں سپلائی کرنا تھا ،ڈی ایس پی صدر افضل لودھی کا کہنا تھا کہ ملزم کا تعلق کالعدم دہشت لشکری جھنگوی سے ہے اور وہ اسلحہ کی سپلائی کے دوران فیملی کے ساتھ سفر کرتا تھا، جس وجہ سے پولیس سے بچ جاتا تھا، ادھر خیبرپختونخوا کے علاقے جمرود علاقہ چورہ کی حدود میں پولیس نے کارروائی کرتے ہوئے زمین میں چھپایا گیا بڑی تعداد میں اسلحہ و بارود تحویل میں لے لیا جس میں 50 کلوگرام بارود، 13 عدد توپ گولے، 17 مارٹر گولے، آرپی جی 14 گولے شامل ہیں، زیر زمین اسلحہ و بارود چھپانے والے دہشت گردایک ماہ قبل گرفتار ہوئے تھے، اور اسلحہ پشاوراورمضافات میں دہشت گردی کی منصوبہ بندی میں استعمال ہونا تھا، جسے بروقت کارروائی کرکے ناکام بنا دیا گیا،ادھر لوئردیر میں سکیورٹی فورسز کے خفیہ آپریشن کے دوران 3دہشت گرد مارے گئے، دہشت گرداہم عمائدین کونشانہ بنانے کی منصوبہ بندی کررہے تھے، ملزمان سے اسلحہ بھی برآمدکرلیاگیا۔