Raza Musani 
اسلام آباد : پاکستان نے بھارتی وزیر دفاع راج ناتھ سنگھ کے دہشت گردی کے الزامات مسترد کرتے ہوئے انہیں مکمل بے بنیاد قرار دیا ہے، ترجمان دفتر خارجہ نے ایک بیان میں کہا کہ پاکستان نے بین الاقوامی برادری کے ساتھ بھارت کی ریاستی سرپرستی میں دہشت گردی اور پاکستان کے خلاف تخریب کاری کے ناقابل تردید ثبوت شیئر کیے ہیں، بھارت، دہشت گردی کو ریاستی پالیسی کے ہتھیار کے طور پر استعمال کرتا ہے، صرف اس ایک سال میں ہی بھارت جوہر ٹاؤن لاہور اور داسو میں چینی اور پاکستانی کارکنوں کے خلاف دہشت گرد حملوں میں ملوث رہا ہے، ان کا کہنا تھا کہ بھارت میں حکمراں بی جے پی آر ایس ایس کا ایک واضح مسلم مخالف اور اقلیت مخالف ایجنڈا ہے، وہ نظریاتی اور سیاسی فائدہ کے لیے پاکستان کو جھوٹی پروپیگنڈا مہمات سے نشانہ بناتے ہیں، ترجمان دفتر خارجہ نے کہا کہ فروری 2019 میں بالاکوٹ میں بھارت کے نام نہاد سرجیکل اسٹرائیک اور خام خیال مہم جوئی نے اسے بری طرح بے نقاب کیا کہ اس میں جھوٹ گھڑنے کے علاوہ کچھ نہیں تھا، انہوں نے یہ بھی کہا کہ پاکستان نے مضبوط انداز میں بھارت کے خلاف جوابی کارروائی کرتے ہوئے خطے میں اسٹریٹجک توازن بحال کیا ہے، ترجمان دفتر خارجہ نے کہا کہ امن کے لیے ہماری خواہش کے باوجود پاکستان کسی بھی جارحانہ بھارتی منصوبے کے خلاف اپنا دفاع کرے گا۔
