Raza Musani 
نیویارک: سعودی عرب اور فرانس کی تجویز کے تحت دو ریاستی حل پر اقوام متحدہ کی کانفرنس بائیس ستمبر کو ہوگی۔
اقوام متحدہ کی جنرل اسمبلی نے ووٹنگ کے ذریعے کانفرنس دوبارہ بلانے کا فیصلہ کیا۔ اس سے پہلے موسم گرما میں مشرق وسطیٰ میں بڑھتی ہوئی پرتشدد صورتحال کے باعث اسے معطل کر دیا گیا تھا۔کانفرنس میں سربراہانِ مملکت اور حکومتوں کی سطح پر شرکت متوقع ہے تاکہ اسرائیل اور فلسطین کے درمیان منصفانہ اور دیرپا امن کے لیے فوری عالمی کوشش کو فروغ دیا جاسکے۔ اقوام متحدہ میں سعودی نمائندے عبدالعزیز الوصیل نے کہا کہ یہ اقدام کسی مخصوص فریق کے خلاف نہیں بلکہ بین الاقوامی قانون اور متعلقہ اقوام متحدہ کی قراردادوں کی پاسداری کے لیے مشترکہ عزم کا مظہر ہے۔
اسرائیل نے فیصلے کو مسترد کرتے ہوئے تجویز کے حامیوں پر طریقہ کار کے حوالے سے دباؤ ڈالنے اور شفافیت کے فقدان کا الزام عائد کیا۔ امریکہ نے کہاکہ کانفرنس اور اس کی بنیاد بننے والی قرارداد، دونوں کی قانونی حیثیت مشکوک ہے۔
