دو ریاستی حل، رکاوٹ ڈالنے والے ممالک پر پابندیاں لگانے پر زور

میڈرڈ : اسپین نے دو ریاستی حل کی راہ میں رکاوٹ ڈالنے والے یورپی ممالک پر بھی پابندیاں لگانے پر زور دیا ہے۔ ہسپانوی وزیر خارجہ خوسے مانوئیل الباریز نے یورپی یونین میں خارجہ و سلامتی امور کے سربراہ کو بھیجے گئے خط میں غزہ کے حوالے سے جامع یورپی اقدام کی ضرورت پر زور دیا ہے۔ الباریز نے غزہ اور فلسطین کے حوالے سے پانچ نکاتی منصوبہ پیش کیا ہے جس میں اسرائیل کو اسلحہ بیچنے پر پابندی۔ فلسطینی اتھارٹی کی مالی مدد۔ عالمی عدالت انصاف کے فیصلوں پر عملدرآمد۔ دو ریاستی حل کیلئے پیشرفت اور یورپی یونین اور اسرائیل کے درمیان معاہدے کی معطلی شامل ہے۔ ہسپانوی وزیر خارجہ نے کہا کہ اب باتوں کا وقت نہیں بلکہ عمل کا وقت ہے۔ جنگ کو روکنے اور غزہ کے اسرائیلی محاصرے کو توڑنے کے لیے اقدامات کرنے چاہئیں۔ انہوں نے کہا کہ دوریاستی حل کیلئے کانفرنس کی بھی بھرپور حمایت کی اور کہا کہ بہت جلد زیادہ تر یورپی ممالک فلسطین کو تسلیم کر لیں گے۔