پولینڈ میں دھماکے سے دو افراد ہلاک، متعدد زخمی، روس پر میزائل حملے کا الزام

کیف : یوکرین جنگ بڑے تنازع میں بدلنے لگی۔ پولینڈ میں میزائل گرنے سے صورتحال مزید خراب ہوگئی۔ یوکرین پر روسی میزائلوں کی بارش کے دوران نیٹو کے رکن پولینڈ کے سرحدی قصبے میں دھماکا سے دو افراد ہلاک اور کئی زخمی ہوگئے۔ پولش میڈیا نے دعویٰ کیا ہے کہ دو روسی میزائل گرنے سے اموات ہوئیں۔ پولش حکومت نے فوج کو الرٹ اور جنگ کیلئے تیار رہنے کی ہدایت کردی۔ تاہم پولینڈ کے صدر نے کہا ہےکہ میزائل روسی ساختہ ہیں لیکن کہاں سے داغے گئے ابھی اس کی تحقیقات کررہے ہیں۔ ادھر امریکی صدر جوبائیڈن نے کہا ہے کہ یہ امکان نہیں کہ میزائل روس کی جانب سے فائر کیا گیا ہے۔ نیٹو نے بھی ہنگامی اجلاس طلب کرلیا۔ اور واضح کیا کہ تحققیات کے بعد اقدامات کا فیصلہ کریں گے۔ روسی وزارت دفاع نے پولینڈ میں حملے کی تردید کرتے ہوئے خبروں کو بےبنیاد قرار دے دیا اور کہاکہ جان بوجھ کر کی جانے والی اشتعال انگیزی کا مقصد صورتحال کو خراب کرنا ہے۔ اقوام متحدہ نے بھی یوکرین کے خلاف جنگ کو بڑھاوا دینے سے گریز کرنے پر زور دیا ہے۔