ٹرمپ کا غزہ پر جلد معاہدے کا دعویٰ، حماس کو آخری وارننگ

واشنگٹن : امریکی صدر ڈونلڈ ٹرمپ نے غزہ پر جلد معاہدے کا دعویٰ کرتے ہوئے حماس کو اسرائیلی مغویوں کی رہائی کے لیے آخری وارننگ دے دی۔ امریکی صدر ڈونلڈ ٹرمپ نے صحافیوں سے گفتگو میں کہا ہے کہ ان کی انتظامیہ ایک ایسے حل پر کام کر رہی ہے جو غزہ کے لیے بہتر ہو۔ ٹرمپ نے غزہ پر اسرائیل کی جاری جنگ اور درجنوں اسرائیلی قیدیوں کو ایک جہنمی مسئلہ قرار دیا۔ انہوں نے کہا کہ وہ اس مسئلہ کو مشرق وسطیٰ سمیت سب کیلئے حل کرنا چاہتے ہیں۔
اس سے پہلے اپنے سوشل میڈیا پیغام میں ٹرمپ نے حماس کو دھمکی دی تھی کہ یہ ان کی آخری وارننگ ہے اگر انہوں نے اسرائیل کے ساتھ طے شدہ شرائط کو تسلیم نہ کیا تو سنگین نتائج بھگتنے ہوں گے۔ ٹرمپ نے دعویٰ کیا کہ اسرائیل نے میری شرائط تسلیم کر لی ہیں اب حماس بھی یہ شرائط تسلیم کرے۔ اس موقع پر حماس کے لیے بات چیت کے دروازے بند ہو سکتے ہیں اور اس کے بعد کوئی نرم رویہ نہیں اپنایا جائے گا۔