Raza Musani 
واشنگٹن : امریکا نے قومی سلامتی اور عوامی تحفظ سے متعلق خدشات کی بنیاد پر انیس ممالک کی تمام امیگریشن درخواستوں کو روک دیا ہے۔ ان میں بیشتر مسلم ممالک شامل ہیں۔
امریکی امیگریشن حکام کے مطابق یہ اقدام ان انیس ممالک کے خلاف کیا گیا ہے جن پر جون میں جزوی سفری پابندیاں عائد کی گئی تھیں۔ نئی ہدایات کے بعد شہریت کی حلف برداری کی تقاریب بھی معطل کر دی گئیں۔ یہ اقدام ایسے وقت سامنے آیا ہے جب صدر ڈونلڈ ٹرمپ سفری پابندی والے ممالک کی تعداد انیس سے بڑھا کر تیس کرنے پر غور کر رہے ہیں۔ واضح رہے کہ صدر ٹرمپ نے افغانستان، برما، چاڈ، کانگو، استوائی گنی، اریٹیریا، ہیٹی، ایران، لیبیا، صومالیہ، سوڈان اور یمن سمیت انیس ممالک پر سخت ترین پابندیاں لگائی تھیں۔ نئی پالیسی کے تحت ان ممالک سے تعلق رکھنے والے افراد کی زیرِ التوا درخواستیں روک دی گئی ہیں اور ان کا ’از سرِ نو جائزہ‘ لیا جائے گا۔
امریکا کی ہوم لینڈ سکیورٹی کی سیکریٹری کرسٹی نویم کا کہنا ہے کہ وہ ایسے ممالک پر مکمل سفری پابندی کی سفارش کریں گی جو امریکا کو قاتلوں، لُٹیروں اور سماجی بوجھ بننے والوں سے بھر رہے ہیں۔
