صیہونی فوج نے سینکڑوں فلسطینیوں کی لاشیں قبضے میں لے لیں

غزہ : صیہونی فوج نے بچوں اور قیدیوں سمیت سینکڑوں فلسطینیوں کی لاشیں قبضے میں لے لیں۔ فلسطینی گروپ نیشنل کمپین فار ریکوری آف مارٹائرز باڈیز نے دعویٰ کیا ہے کہ اسرائیل نے سات سو چھبیس فلسطینیوں کی لاشوں کو ریفریجریٹرز اور قبرستانوں میں محفوظ کیا ہوا ہے۔
گروپ کے بیان کے مطابق 256 شہدا کی لاشیں مدفون ہیں جبکہ 2015 میں لاشوں پر قبضے کی پالیسی دوبارہ شروع ہونے کے بعد 469 لاشیں تحویل میں لی گئی ہیں۔ گروپ کے مطابق فہرست میں 67 بچوں، 85 قیدیوں اور 10 خواتین کی باقیات شامل ہیں۔ قابض اسرائیلی انتظامیہ نے 2023 میں حالیہ جارحیت کے آغاز کے بعد غزہ سے 15 سو سے زائد لاشیں قبضے میں لی گئی ہیں۔ گروپ کے مطابق لاشوں کو سدی تیمان کیمپ میں رکھا جا رہا ہے، جو اسرائیل کی منظم اور طویل مدتی خلاف ورزیوں کی تصدیق ہے۔ گروپ نے کہا کہ لاشوں کو روکنا نوآبادیاتی تسلط کی ایک منظم توسیع کی نشاندہی ہے جس کا مقصد انہیں سودے بازی کیلئے استعمال کرنا ہے۔