مغرب جھوٹ کی سلطنت ہے، اسکا رویہ ناقابل برداشت ہو چکا ہے، روسی وزیر خارجہ

نیویارک: روسی وزیر خارجہ سرگئی لاروف نے مغرب کو جھوٹ کی سلطنت قرار دیتے ہوئے کہا ہے کہ مغرب کا جارحانہ رویہ باقی دنیا کے لیے ناقابل برداشت ہو چکا ہے۔ اقوام متحدہ کی جنرل اسمبلی سے خطاب میں روسی وزیرخارجہ نے یوکرین تنازعہ کی جانب اشارہ کرتے ہوئے کہا کہ مغرب کی طرف سے عالمی اکثریت کو دھوکا دیا جا رہا تھا۔ انہوں نے مغربی ریاستوں کے عدم اعتماد کو ثابت کرنے کے لیے مغربی حکام کے ماضی اور حال کے فریب کارانہ رویے کی مثالیں دیں اور کہاکہ امریکی اور یورپی ہر طرح کے وعدے کرتے ہیں لیکن انہیں پورا نہیں کرتے۔ انہوں نے کہا کہ امریکا اور اس کے زیر اثر مغربی ممالک اجتماعی تنازعات کو ہوا دے رہے ہیں جس کا مقصد انسانیت کو دشمن بلاکس میں تقسیم کرناہے۔ اس سے مجموعی اہداف کے حصول میں رکاوٹ آرہی ہے۔ انہوں نے کہا کہ مغربی ممالک ایک حقیقی کثیر قطبی عالمی نظام کی تشکیل کو روکنے کے لیے سب کچھ کر سکتے ہیں۔ دنیا اس سے تنگ ہے اور وہ مزید کسی دھوکے میں نہیں رہنا چاہتی ہے۔