اقوام متحدہ نے طالبان کی عبوری حکومت کو تسلیم کرنے سے انکار کردیا

نیویارک : اقوام متحدہ نے طالبان کی عبوری حکومت کو تسلیم کرنے سے انکار کردیا۔ جنرل اسمبلی نے ایک قرارداد منظور کی ہے جس میں طالبان کو سخت پیغام دیا گیا ہے کہ عالمی ادارہ خواتین، لڑکیوں اور اقلیتوں سمیت انسانی حقوق کے احترام کے بغیر طالبان کی عبوری حکومت کو تسلیم نہیں کرے گا۔ جنرل اسمبلی میں ترکیہ سمیت 59 ممالک کے تعاون سے تیار کی گئی جرمنی کی قرارداد پر ووٹنگ ہوئی۔ جس میں طالبان کے قبضے کے بعد افغانستان میں پیشرفت، دہشت گردی، انسانی حقوق کی پامالی اور سماجی و اقتصادی صورتحال پر تشویش کا اظہار کیا گیا ہے۔ 116 ممالک نے قرارداد کے حق میں ووٹ دیا، جبکہ روس اور چین سمیت 10 ممالک نے قرارداد کے متن کو غیر متوازن قرار دیکر ووٹنگ میں حصہ نہیں لیا۔ قرارداد میں انسانی حقوق کے مکمل احترام اور زندگی کے تمام شعبوں میں خواتین کی بامعنی شرکت پر زور دیا گیا ہے۔ قطر میں طالبان کے سیاسی دفتر کے سربراہ سہیل شاہین نے اپنے ردعمل میں کہا کہ طالبان اسلامی اصولوں اور اقدار کے مطابق عوام کے تمام جائز حقوق اور مطالبات کو پورا کرنے کے لیے پرعزم ہیں اور وہ اس مقصد کو حاصل کرنے کے لیے صحیح ذرائع اور ماحول فراہم کرنے کی کوشش کررہے ہیں۔