امریکا اور سعودیہ کے درمیان سیکیورٹی معاہدہ کا امکان

واشنگٹن: امریکا نے اسرائیل سعودی تعلقات معمول پر لانے کیلئے سعودی عرب کے ساتھ جاپان یا جنوبی کوریا طرز جیسا سیکیورٹی معاہدہ کرنے کا فیصلہ کرلیا۔ امریکی اخبار نیویارک ٹائمز نے ایک امریکی عہدیدار کے حوالے سے بتایاکہ وائٹ ہاؤس اور سعودی حکام باہمی دفاعی معاہدے کی شرائط پر تبادلہ خیال کر رہے ہیں۔ معاہدے کے تحت امریکا سعودی سرزمین پر کسی دوسرے ملک کے حملے کی صورت میں فوجی مدد فراہم کرے گا۔ امریکی اخبار کے مطابق سعودی عرب نے اسرائیل سے تعلقات کیلئے فلسطینی ریاست کو تسلیم کرنے کے ساتھ ساتھ سویلین جوہری پروگرام میں امریکی مدد اور دفاعی معاہدہ کا مطالبہ کیا ہے۔ اخبار کے مطابق ایسے معاہدوں کو عام طور پر کانگریس کی منظوری کی ضرورت ہوتی ہے، جس کی ترقی پسند ڈیموکریٹس مخالفت کر سکتے ہیں۔ تاہم امریکی حکام نے کہا کہ سعودی-اسرائیلی تعلقات کو معمول پر لانے سے فلسطینیوں اور اسرائیلیوں کے درمیان کشیدگی کو کم کرنے میں مدد ملے گی اور ممکنہ طور پر سعودی عرب کو چین سے دور کرنے میں مدد ملے گی۔