فلسطینی ریاست تسلیم شدہ ہے، ہر حال میں قائم ہو گی، ابوردینہ

رام اللہ : فلسطینی صدر کے ترجمان نبیل ابو رودینہ نے کہا ہے کہ فلسطینی ریاست ہر حال میں قائم ہوگی جس کا دار الحکومت مشرقی بیت المقدس ہوگا۔ ابو رودینہ نے واضح کیا کہ فلسطینی ریاست پہلے ہی عالمی سطح پر تسلیم شدہ ہے۔ کیونکہ اقوام متحدہ کے 149 رکن ممالک اسے تسلیم کرچکے ہیں۔ آزاد فلسطینی ریاست کے قیام کے لیے کسی کے اجازت نامے یا منظوری کی ضرورت نہیں۔ ترجمان نے کہا کہ نیتن یاہو کی حکومت امن میں کوئی دل چسپی نہیں رکھتی، حالانکہ امن واستحکام اسی وقت ممکن ہوگا جب 1967 کی سرحدوں پر مبنی ایک آزاد فلسطینی ریاست قائم ہو۔ اس کے بغیر نہ امن ممکن ہے نہ سلامتی۔ ابو ردینہ نے خبردار کیا کہ نیتن یاہو اور ان کی انتہا پسند حکومت پورے خطے کو تباہی کی طرف دھکیل رہے ہیں۔