عالمی برادری خصوصاً عرب رہنماؤں کی بے حسی برقرار، الشفا میں المیہ رونما، آئی سی یو کے تمام مریض چل بسے

غزہ: عالمی برادری خصوصاً عرب رہنماؤں کی بے حسی برقرار۔ غزہ کے الشفا اسپتال میں ایک اور بڑا المیہ رونما ہوا ہے جہاں آئی سی یو کے تمام 55 مریض جان کی بازی ہار گئے۔ الشفا میڈیکل کمپلیکس کی انتظامیہ کا کہنا ہے کہ اسپتال میں ہر ایک منٹ میں ایک فلسطینی شہید ہو رہا ہے۔ نومولود اور شیر خوار بچوں سمیت بوڑھے اور ہر مریض موت کے قریب ہے۔ رات گئے آئی سی یو کے بائیس مریض دم توڑ گئے۔ تین دن میں شہدا کی تعداد 55 ہوگئی ہے۔ انتظامیہ کا کہنا ہے کہ اسرائیلی محاصرے کے باعث الشفا اسپتال زندہ لوگوں کیلئے کھلا قبرستان بن چکا ہے۔ دنیا کی آنکھوں کے سامنے بےگناہ لوگوں، بچوں کو مرنے کیلئے چھوڑنا جنگی جرائم سے کم نہیں۔ انتظامیہ نے مزید بتایا کہ اسرائیل نے نوزائیدہ بچوں کیلئے انکوبیٹر فراہم کردیا مگر بجلی کے بغیر وہ تابوت سے کم نہیں۔