غزہ تنازعہ کی جغرافیائی توسیع کو روکنا ضروری ہے، پیوٹن

ماسکو: روسی صدر ولادیمر پیوٹن نے کہا ہے کہ فلسطین اور اسرائیل کے درمیان تنازعہ کی جغرافیائی توسیع کو روکنا ضروری ہے۔ برکس گروپ کے ہنگامی اجلاس سے خطاب میں پیوٹن نے کہاکہ اس وقت فوری حل طلب مسئلہ، فلسطین اور اسرائیل کے درمیان طویل مدتی جنگ بندی کو یقینی بنانا ہے۔ قیدیوں کی رہائی کے لیے انسانی بنیادوں پر مکمل جنگ بندی ضروری ہے۔انہوں نے کہاکہ غزہ کی پٹی کی صورتحال سے ظاہر ہوتا ہے کہ امریکہ فلسطین اسرائیل مسئلے کے حل میں ثالثی کی کوششوں پر اجارہ داری قائم کرنے کی کوشش کر رہا ہے۔ انہوں نے کہا کہ فلسطینیوں کی ایک سے زیادہ نسل اقوام متحدہ کی قراردادوں کو سبوتاژ کرنے کی وجہ سے ناانصافی کے احساس کے ساتھ پروان چڑھی ہے۔ ماسکو اس مسئلے کے سفارتی حل پر اصرار کرتا ہے۔