Raza Musani 
رام اللہ : اسرائیلی فوج نے تشدد کی تازہ ترین ہلاکت خیز کارروائی میں مزید دو فلسطینی نوجوانوں کو گولی مار کر شہید کر دیا ہے۔ صیہونی فوج کی تازہ ترین کارروائی مقبوضہ مغربی کنارے کے مختلف علاقوں میں کی گئی۔ فلسطینی وزارت صحت کے مطابق 14 سالہ عادل ابراہیم داؤد کو شمالی مغربی کنارے کے شہر قلقیلیہ میں سر پر گولی مار کر شہید کیا گیا۔ دوسرے شہید کی شناخت 19 سالہ مہدی لدادوہ کے نام سے ہوئی ہے جسے رام اللہ شہر کے قریب گولی مار کر شہید کیا گیا۔ مقامی ذرائع کے مطابق اسرائیلی فوجیوں نے نوجوان کو گولی مارنے کے بعد گرفتار کرنے کی کوشش کی۔ انہوں نے نوجوان کی جان بچانے کی کوشش کرنے والے فلسطینیوں پر بھی حملہ کیا۔
