طالبان حکومت کا روس کے ساتھ رعایتی قیمت پر تیل، گیس اور گندم خریدنے کا معاہدہ

کابل : افغانستان کی طالبان حکومت نے روس کے ساتھ رعایتی قیمت پر تیل، گیس اور گندم خریدنے کا معاہدہ کرلیا۔ رپورٹ کے مطابق طالبان نے اپنے پہلے بین الاقوامی معاہدے پر دستخط کر دیے ۔ معاہدے کے تحت روس افغانستان کو سالانہ 10 لاکھ ٹن پیٹرول، 10 لاکھ ٹن ڈیزل، 5 لاکھ ٹن ایل پی جی اور 20 لاکھ ٹن گندم فراہم کرے گا۔ طالبان کے اقتدار میں آنے کے بعد افغانستان کا یہ پہلا بین الاقوامی تجارتی معاہدہ ہے۔ افغان قائم مقام وزیر صنعت و تجارت حاجی نور الدین عزیزی نے بتایا کہ معاہدہ غیر متعین مدت تک ٹھیک چلنے کے بعد طویل مدتی معاہدے میں بدلا جائے گا۔ افغان وزارت صنعت و تجارت اپنے تجارتی شراکت داروں میں اضافے کے لیے کام کر رہی ہے۔ روس نے طالبان انتظامیہ کو اجناس کی اوسط عالمی قیمتوں میں رعایت کی پیشکش کی تھی۔