Raza Musani 
نیویارک: پاکستان نے اقوام متحدہ کو خبردار کیا ہے کہ ہندوستان کا سندھ طاس آبی معاہدے کو یکطرفہ طور پر معطل کرنے کا فیصلہ خطرناک اقدام اور چوبیس کروڑ سے زائد افراد کی بقا کے لیے خطرہ ہے۔ اقوام متحدہ میں پاکستان کے نائب مستقل مندوب عثمان جدون نے ایک اجلاس سے خطاب میں عالمی برادری سے اپیل کی کہ وہ ایسے اقدامات کے رونما ہونے سے پہلے ہی متحرک ہو جائے جو انسانی بحران کو جنم دے سکتے ہیں یا خطے کو عدم استحکام سے دوچار کر سکتے ہیں۔ انہوں نے کہا کہ ہندوستان اپنے قانونی فرائض کی مکمل پاسداری کرے اور پاکستان کے لیے زندگی کی علامت ان دریاؤں کا بہاؤ روکنے، موڑنے یا محدود کرنے سے باز رہے۔ پاکستان ایسے کسی بھی اقدام کو کبھی قبول نہیں کرےگا۔ عثمان جدون نے ہندوستانی قیادت کے خطرناک بیانات کی طرف بھی توجہ دلائی اور کہا کہ پاکستان کے عوام کو بھوکا مارنے جیسے اعلانات ہندوستانی قیادت کی انتہا درجے کی خطرناک اور بگڑی ہوئی سوچ کو ظاہر کرتے ہیں۔
