برطانیہ میں ہڑتالوں کا موسم، انڈر گراؤنڈ ریلوے ورکرز کی ہڑتال، ہزاروں شہری پریشان

لندن: معاشی بحران کے سبب برطانیہ ہڑتالوں کی لپیٹ میں آگیا۔ لندن میں انڈر گراؤنڈ ریلوے ورکرز کی ہڑتال سے ہزاروں شہری مشکلات کا شکار ہوگئے۔ 24 گھنٹے پر مشتمل ہڑتال سے مسافروں کو شدید پریشانی کا سامنا کرنا پڑا۔ بس اسٹاپ پر مسافروں کی لمبی قطاریں لگ گئیں۔ تنخواہیں نہ بڑھانے کیخلاف یہ انڈر گراؤنڈ ورکرز کی مسلسل چھٹی ہڑتال ہے۔ اُدھر تین لاکھ سے زیادہ نرسوں کے بعد ایک لاکھ سے زائد سرکاری ملازمین نے بھی تنخواہوں اور پنشن میں اضافے کیلئے ہڑتال کے حق میں ووٹ دیدیا۔ حکومت کی مناسب تجاویز سامنے نہ آنے پر 18 نومبر کو تفصیلات کا اعلان کردیا جائے گا۔ ہیتھرو ائیرپورٹ کے سینکڑوں ملازمین 18 نومبر سے 21 نومبر تک تین روزہ ہڑتال کریں گے۔ ڈیڑھ سو یونیورسٹیوں کے 70 ہزار سے زائد ملازمین نے 24، 25 اور 30 نومبرکو ہڑتال کا اعلان کیا ہے۔ ماحولیاتی اداروں کے ملازمین ۔ بندرگاہوں کے ملازمین اور رائل میل ورکرز نے بھی ہڑتال کا اعلان کررکھا ہے۔