مغربی کنارے کا الحاق روکنے کے اقدامات کئے جائیں، محمود عباس

اوسلو : صدر محمود عباس نے ناروے کی جانب سے فلسطین کو تسلیم کرنے اور حمایت پر شکریہ ادا کرتے ہوئے اسرائیل کے مغربی کنارے کے الحاق کے اقدامات روکنے کا مطالبہ کیا ہے۔ اوسلو میں ناروے کی پارلیمنٹ کے صدر سے ملاقات میں محمود عباس نے غزہ میں جنگ بندی کو مستحکم بنانے، انسانی امداد کی ترسیل، تعمیر نو کے فروغ، جبری بے دخلی اور الحاق کی روک تھام پر زور دیا۔ عباس نے کہا کہ مقبوضہ مغربی کنارے اور یروشلم میں اسرائیلی خلاف ورزیاں، نوآبادیاتی توسیع اور مقدس مقامات کو لاحق خطرات تشویشناک ہیں۔ انہوں نے خبردار کیا کہ حالیہ فیصلے الحاق کو گہرا کرنے، بستیوں کی توسیع اور اراضی پر قبضے کی راہ ہموار کر رہے ہیں۔ صدر عباس نے یورپی یونین اور عالمی برادری سے فوری و مؤثر اقدامات اور اسرائیلی حکومت کو جوابدہ ٹھہرانے کا مطالبہ کیا، جبکہ ناروے، یورپی یونین اور امریکا پر زور دیا کہ وہ فلسطینی ٹیکس رقوم کی غیرقانونی کٹوتیوں سمیت مالی دباؤ ختم کرانے کے لیے اسرائیل پر دباؤ ڈالیں۔