Raza Musani 
صنعا: یمن کی حکومت نے اٹھائیس اگست کو اسرائیلی حملے میں وزیراعظم احمد غالب الرحاوی اور ان کی کابینہ کے وزرا کی شہادت کی تصدیق کردی۔ یمنی حکومت کے جاری کردہ اعلامیے کے مطابق شہید وزیراعظم کی شہادت یمن کی فلسطینیوں سے یکجہتی کے جذبے کو مزید مضبوط بنائے گی۔ شہید یمنی وزیراعظم فلسطین کی آزادی کے وکیل کے طور پر مشہور تھے.
یمن کی حکومت نے جمعرات کو کئے گئے حملے میں شہادتوں کی تصدیق کردی۔ اٹھائیس اگست کو وزیراعظم احمد غالب الرحاوی کی حکومت کا ایک سال مکمل ہونے پر دارالحکومت صنعا میں اجلاس جاری تھا۔ تقریب میں حکومت کی کارکردگی کا جائزہ لیا جارہا تھا۔جس پر اسرائیلی فضائیہ نے بمباری کردی۔ حملے میں شہید یمنی وزیراعظم نے دس اگست دو ہزار چوبیس کو عہدہ سنبھالا تھا۔ شہید وزیراعظم احمد غالب فلسطین کی آزادی کے وکیل کے طور پر مشہور تھے۔
شہید وزیراعظم احمد غالب الرحاوی نے یمن کی ترقی اور اسرائیل کیخلاف مزاحمتی تنظیم انصار اللہ کے حملوں کی بھرپور حمایت کی۔ شہید نے یمن پر غیر ملکی حملوں اور قبضے کے خلاف عالمی فورم پر بھی بھرپور آواز اٹھائی۔ شہید عرب اور مسلم اتحاد کے داعی مانے جاتے تھے۔
اسرائیلی حملے میں وزیراعظم کے علاوہ یمنی وزیر خارجہ، وزیر توانائی، وزیر نقل و حمل، وزیر سماجی امور، وزیر انصاف، وزیر کاشتکاری، وزیر اقتصاد نے بھی جام شہادت نوش کیا۔
