کربلائے معلیٰ میں زائرین کا سمندر، اربعین پر دو کروڑ سے زائد کی پرسہ داری

کربلا : اربعین پر کربلائے معلیٰ میں دنیا کے مختلف ممالک اور عراق بھر سے لاکھوں زائرین نے کربلا پہنچ کر نواسۂ رسول (ص)، فرزند علی و بتول (ع)، قائد انسانیت، حضرت امام حسین علیہ السلام کی بارگاہ عالیہ میں خراج عقیدت پیش کیا۔ نجف سے کربلا تک انسانوں کا ایک سمندر تھا جو پوری عقیدت کے ساتھ سفر عشق میں مشغول رہا۔ سرکاری اعدادوشمار کے مطابق رواں سال دو کروڑ 11 لاکھ سے زائد زائرین نے کربلا کا رخ کیا۔ جن میں سے 50 لاکھ غیر ملکی تھے۔ اربعین حسینی کے موقع پر کربلائے معلی میں زائرین کا سمندر دکھائی دیا۔ کربلا زائرین سے کھچا کھچ بھرا رہا۔ کربلا سے نجف کے راستے میں زائرین کی خدمت کیلئے جگہ جگہ سبیلوں کا اہتمام کیا گیا۔ جگہ جگہ مواکب قائم کیے گئے جہاں زائرین کے آرام اور کھانے پینے کا بندوبست کیاگیا۔