روس پر پابندیاں امریکا اور یورپ کے گلے پڑگئیں، موسم سرما میں توانائی کے بحران کا خدشہ

واشنگٹن : امریکا کی روس پر پابندیاں خود امریکا اور یورپ کیلئے تباہ کن ثابت ہورہی ہیں اور اس فیصلے نے امریکا اور یورپ میں گیس اور تیل کی قیمتوں کو آگ لگا دی ہے۔ گیس فراہمی میں کمی سے یورپ میں موسم سرما انتہائی سخت ہونے کے قوی امکانات ہیں۔ اور گیس و بجلی کے بحران کے خدشات نے سراٹھالیا ہے برطانیہ میں موسم سرما کے دوران گیس اور بجلی کی لوڈ شیڈنگ کا فیصلہ کرلیا گیا ہے۔ برطانیہ میں ایندھن ریگولیٹرز نے کہا ہے کہ دسمبر سے مارچ تک یومیہ تین گھنٹے لوڈشیڈنگ کی جائے گی۔ جبکہ لوگوں کو گیس اور بجلی کے استعمال میں کمی کی ترغیب دی جارہی ہے۔ برطانیہ کی طرح فرانس اور یورپی یونین کے دیگر رکن ممالک میں بھی موسم سرما کے دوران بجلی کی لوڈ شیڈنگ کے امکانات بڑھ گئے۔ ادھر بیلجیم کے وزیراعظم الیگزینڈر ڈی کروُ نے خبردار کیا ہے کہ یورپ میں توانائی کی قیمتیں کم کرنے کیلئے اقدامات نہ کیے گئے تو خطے میں نمایاں طور پر صنعتی سرگرمیاں کم ہو جائیں گی اور سماجی بے چینی میں اضافہ ہوگا۔ جب تک گیس مارکیٹس میں مداخلت نہیں ہوگی، ہمیں صنعتی سرگرمیاں بند ہونے کا خطرہ درپیش ہے اور اس صورتحال کے نتائج دور رس ثابت ہو سکتے ہیں۔