Raza Musani 
بغداد : ایرانی زائرین کے اژدہام اور ناقص انتظامات کی وجہ سے عراقی سرحدوں کو بند کردیا گیا۔ ایران کی مرکزی اربعین کمیٹی کے سربراہ سید مجید میر احمدی نے کہا ہے کہ شلمچہ اور مہران باڈر پر تشویشناک واقعات پیش آنے اور زائرین کی سلامتی اور سیکیورٹی کے لئے سنگین خطرات پیدا ہونے کی وجہ سے مہران باڈر پر مرکزی اربعین کمیٹی کا ہنگامی اجلاس کیا گیا۔ اجلاس میں وزیر داخلہ، اعلیٰ سیکیورٹی اہلکار، صوبہ ایلام کے گورنر اور دیگر متعلقہ حکام نے شرکت اور باڈر کی صورت حال کا جائزہ لیا اور وہاں پیش آنے والے واقعات کا تجزیہ کیا گیا۔ اجلاس میں بتایا گیا کہ عراقی حکام نے زائرین کی تعداد کم کرنے کا مطالبہ کیا ہے۔ میر احمدی نے کہا کہ پریشانی کی بنیادی وجہ عراق میں لازمی تیاریوں اور مطلوبہ انتظامات کا فقدان ہے جس کی وجہ سے زائرین کے داخلے میں سستی اور حمل و نقل میں تیزی نہ ہونا، بارڈر کے دوسری جانب سہولیات کا فقدان، حد سے زیادہ بھیڑ اور گرم موسم جیسے سنگین مسائل پیدا ہوگئے ہیں۔ مرکزی اربعین کمیٹی کے سربراہ کا کہنا تھا کہ مسلسل 5 گھنٹے غور و فکر کے بعد یہ فیصلہ کیا گیا کہ تمام زائرین کی سلامتی اور سیکیورٹی ہمارے لئے ریڈ لائن ہے لہذا ہمارے عراق کی جانب جانے والے تمام راستے اگلی اطلاع تک غیر معینہ مدت کے لئے بند کردیئے جائیں۔
