مشرق وسطیٰ میں امن، مسئلہ فلسطین کے دو ریاستی حل سے مشروط

نیویارک: عرب ممالک نے مشرق وسطیٰ میں امن کو مسئلہ فلسطین کے دو ریاستی حل سے مشروط کیا ہے۔ نیو یارک میں جنرل اسمبلی کے اجلاس کے موقع پر عرب وزرائے خارجہ کا اجلاس ہوا۔ جس میں مشرق وسطیٰ امن عمل کی بحالی کی کوششوں کے حوالے سے تبادلہ خیال کیا گیا۔ امن عمل کے احیا کی حوصلہ افزائی کے لیے اقدامات پر تبادلہ خیال کے لیے سیاسی، اقتصادی اور انسانی ورکنگ ٹیموں کی تشکیل کا معاملہ زیر بحث آیا۔ مشرق وسطیٰ امن عمل میں پیشرفت کے لیے مشترکہ کوششوں میں ہم آہنگی کے طریقہ کار پر بھی بات ہوئی۔ سعودی وزیر خارجہ نے کہا ہے کہ آزاد فلسطینی ریاست کے بغیر فلسطین، اسرائیل تنازع کا کوئی حل نہیں ہے۔ تنازع کے دو ریاستی حل کو سامنے آنا چاہیے۔ انہوں نے کہا کہ ہم مقبوضہ علاقوں میں مسلسل اضافہ دیکھ رہے ہیں۔