غزہ سٹی میں آپریشن بڑے پیمانے پر اموات کا سبب بنے گا، یورپی ممالک

میڈرڈ : اسپین، ناروے، آئرلینڈ، سلووینیا، آئس لینڈ اور لکسمبرگ کے وزرائے خارجہ نے مشترکہ بیان میں غزہ سٹی پر قبضے کے آپریشن کو توسیع دینے کی شدید مذمت کی ہے۔ چھ یورپی ممالک کے بیان میں کہا گیا ہے کہ فوجی کارروائیوں میں شدت عورتوں، بچوں اور بوڑھوں سمیت بے گناہ فلسطینی شہریوں کی ناقابل برداشت موت کا باعث بنے گی اور ساتھ ہی حماس کے زیر حراست اسرائیلی اسیران کی زندگیوں کو بھی خطرے میں ڈالے گی۔ انہوں نے فلسطینیوں کی جبری نقل مکانی کی بھی مذمت کی اور اسے بین الاقوامی قانون کی کھلی خلاف ورزی قرار دیا۔
بیان میں کہاگیا ہےکہ انتہائی کمزور بے گھر شہریوں کے لیے پناہ گاہوں سمیت ضروری شہری بنیادی ڈھانچے کی منظم تباہی ناقابل قبول ہے۔ ان کا کہنا تھا کہ ہم اسرائیلی حکومت پر زور دیتے ہیں کہ وہ فوری طور پر اپنے فیصلے پر نظر ثانی کرے اور کارروائیاں بند کرے۔