ہفتہ وحدت کی مناسبت سے جامعۃ النجف اسکردو میں عظیم الشان محفل میلاد

اسکرود: جشن میلاد صادقین اور ہفتہ وحدت کی مناسبت سے جامعۃ النجف اسکردو میں ایک عظیم الشان محفل منعقد ہوئی۔ اس محفل میں بلتستان اور قومی سطح کے ادباء و شعراء اور دانشوروں نے شرکت کی۔ محفل کی صدارت جامعہ کے پرنسپل شیخ محمد علی توحیدی نے کی جبکہ معروف شاعر، ادیب اور خطیب سید سجاد اطہر موسوی اور شاعر و مصنف احسان علی دانش مہمان خصوصی تھے۔ شیخ احمد علی نوری ممبر جی بی کونسل میزبانی کے فرائض انجام دے رہے تھے۔ اس محفل میں باذوق جوانوں اور طلباء کی کثیر تعداد بھی شریک ہوئی۔ اس پرنور محفل میں ابھرتے ہوئے نوجوان شعراء نے خوب داد تحسین وصول کی۔ مولانا حسین بشیر اور مولانا شجاعت غدیری نے نعت رسول مقبول سے دلوں کو گرمایا اور مولانا عارف حسین نے بلتی قصیدہ پیش کیا۔ قادرالکلام شعراء نے اپنے گرانقدر اشعار کے ذریعے محفل کو نورباران کیا اور سامعین سے بے تحاشا داد تحسین وصول کی۔ جناب محمد یوسف کھسمن نے حالات حاضرہ پر اپنے اشعار سے محفل کو گل و گلزار کیا۔ مہمان خصوصی آقائے سید سجاد اطہر موسوی نے آخر میں اپنے خطاب اور دعائیہ کلمات سے نوازا۔ انہوں نے اپنے خطاب میں کہا کہ قرآن نے سچوں کے ساتھ رہنے کا حکم دیا ہے اور آج ہم دو صادقوں کا نہیں بلکہ چودہ سچوں کے راستے کے راہی ہیں۔ انہوں نے کہا کہ ہم چودہ معصومین(ع) کی مجموعی سیرت کو دیکھیں گے تو ان میں ایسی ہماہنگی نظر آتی ہے کہ ایک ہی معصوم کی سیرت معلوم ہوتی ہے۔ اللہ تعالیٰ ہمیں محمد و آل محمد علیہم السلام کی سیرت پر چلنے کی توفیق عنایت کرے۔ آخر میں انہوں نے عالم اسلام کی سربلندی، عالم کفر کی نابودی اور مملکت خداداد پاکستان کی سلامتی کے لیے خصوصی دعا کی۔