چاند نہیں مانگ رہے جنگ بندی کا مطالبہ کررہے ہیں، مارٹن گریفتھس

جنیوا: اقوامِ متحدہ کے انسانی حقوق کے سربراہ مارٹن گریفتھس نے غزہ میں فوری جنگ بندی کا مطالبہ کردیا۔ مارٹن گریفتھس نے کہا کہ ہم چاند نہیں مانگ رہے بلکہ انسانی ہمدردی کی بنیاد پر جنگ بندی کا مطالبہ کر رہے ہیں تاکہ امدادی کارروائی کی جا سکے۔ انہوں نے کہاکہ آپ اسے چاہے جو بھی کہیں لیکن انسانی ہمدردی کے نقطہ نظر سے یہ سادہ سا مطالبہ ہے کہ انسانیت کی خاطر جنگ بند کی جائے تاکہ معصوم شہریوں کے انخلاء کا عمل محفوظ طریقے سے ممکن ہو سکے اور 22 لاکھ سے زائد محصورین تک امداد پہنچائی جا سکے۔ ہم جنگ بندی کا مطالبہ کررہے ہیں تاکہ متاثرین کی بنیادی ضروریات پوری کی جا سکیں اور جنگ کے نتیجے میں پیدا ہونے والے اس بحران پر قابو پایا جا سکے۔ انہوں نے غزہ میں قید تمام یرغمالیوں کو بغیر کسی شرط کے رہا کرنے کا بھی مطالبہ کیا ہے۔