قومیں اتحاد و اتفاق کے بغیر اکٹھے نہیں رہ سکتیں، علامہ راجہ ناصر عباس

اسلام آباد: چیئرمین مجلس وحدت مسلمین پاکستان علامہ راجہ ناصر عباس جعفری نے کہا ہے کہ یکم اکتوبر کو اسلام آباد میں عظیم الشان عشق پیغمبر اعظم(ص) مرکز وحدت مسلمین کانفرنس کا انعقاد کیا جائے گا، جو بین المسالک کے درمیان وحدت کا عکاس ہوگا، یہ پورا مہینہ ہمارے لئے عید کا مہینہ ہے۔ پریس کانفرنس سے خطاب میں علامہ راجہ ناصر عباس جعفری نے کہاکہ قومیں اتفاق و اتحاد کے بغیر اکٹھے نہیں رہ سکتیں اور انتشار کمزوری و ضعف کا باعث ہے، ریاست کی بھی ذمہ داری ہے کہ وہ ملک میں وحدت کی فضاء کو قائم رکھے، مسلم و غیر مسلم تمام پاکستانیوں کے درمیان اتحاد ضروری ہے۔ انہوں نے مزید کہاکہ پاکستان کے عوام کی درست ترجمانی درست راہ شیعہ سنی آپس میں بھائی ہیں، یہ مسلم پاکستان ہے، یہ شیعہ، سنی پاکستان نہیں ہے، جو بھی لوگ ملک میں مسلکی کھیل کھیلتے ہیں، وہ ملکی سالمیت پر وار کرتے ہیں، اسلامی نظریاتی کونسل کو آگے بڑھ کر وحدت و محبت کے لیے کوشش کرنی چاہیے، اسلامی نظریاتی کونسل پر ہمارے سخت تحفظات ہیں، ایسا لگتا کہ اسلامی نظریاتی کونسل میں مخصوص سوچ کے لوگوں کا قبضہ ہے۔ انہوں نے کہا کہ ہمارا ملک اس وقت تاریخ کے سخت اور نازک ترین دور سے گزر رہا ہے، ہر مسلک و مذہب کے افراد کو ایک دوسرے کا احترام کرنا چاہیئے، فرقہ وارانہ کشیدگی کو ہوا دینے کے لیے ہمارے ملک میں بہت کوششیں ہو رہی ہیں انہوں نے کہاکہ پاکستان میں اسرائیل کی حمایت میں کام کرنے والے احمقوں کی جنت میں ہیں۔ اسرائیل کو تسلیم کرنا یعنی کشمیر کو بھول جانا ہے، اسرائیل جو خود ڈوب رہا ہے، کچھ لوگ ان کی کشتی میں سوار ہونا چاہتے ہیں۔