مسلم اقوام اسرائیل سے مقابلے کیلئے متحدہ محاذ بنائیں، ایرانی صدر

تہران: ایرانی صدر مسعود پیزشکیان کا مسلم اقوام کو اسرائیل کے خلاف متحدہ محاذ بنانے کی ضرورت پر زور۔ پاکستانی وزیر داخلہ محسن نقوی سے ملاقات میں ایرانی صدرمسعود پزشکیان نے کہا کہ جاری چیلنجوں کے تناظر میں مسلم ممالک کا اتحاد ناقابل تردید ضرورت ہے۔انہوں نے کہا کہ اگر مسلم اقوام وحدتِ امتِ اسلامی کی اہمیت کو سمجھیں تو وہ ایک متحد قوت بن کر صیہونی حکومت کی تفرقہ انگیز اور مجرمانہ پالیسیوں کے مقابلے میں ڈٹ کر کھڑی ہو سکتی ہیں۔ انہوں نے مزید کہا کہ صیہونی حکومت کی بقا کا انحصار مسلم ممالک میں تفرقہ ڈالنے اور بدامنی پھیلانے پر ہے۔ اسلامی دنیا کے پالیسی سازوں اور سیاست دانوں کو اس خطرناک حکمت عملی سے مکمل طور پر باخبر رہنا چاہیے اور امتِ اسلامی کے درمیان اتحاد و یگانگت کو فروغ دے کر اس سازش کو ناکام بنانا چاہیے۔