امریکا میں میڈیٹ تقسیم، سینیٹ میں ڈیموکریٹس اور ایوان نمائندگان میں ری پبلکنز کی برتری

واشنگٹن: امریکی ریاست نیواڈا میں کامیابی سے صدر جوبائیڈن کی جماعت ڈیموکریٹس نے سینیٹ پر کنٹرول حاصل کرلیا۔ نیواڈا کی نشست پر ڈیموکریٹ امیدوار کیتھرین کورٹز مسٹو نے ری پبلکن امیدوار کو ووٹوں کے معمولی فرق سے شکست دی۔ جبکہ جھولتی ریاست ایریزونا میں بھی ڈیموکریٹک مارک کیلی کامیاب رہے۔اس کامیابی کے بعد سو رکنی سینیٹ میں ڈیموکریٹس کی تعداد 50 ہوگئی ہے۔ جبکہ ری پبلکنز کی 49 نشستیں ہیں۔ جارجیا میں6 دسمبر کو ہونیوالا ری الیکشن ڈیموکریٹس جیتے تو ان کی برتری مستحکم ہوجائے گی۔ دوسری جانب ایوان نمائندگان میں ری پبلکنز کو برتری حاصل ہے ۔ 435 کے ایوان نمائندگان میں ری پبلکنز نے 211 جبکہ ڈیموکریٹس نے 202 نشستوں پر کامیابی حاصل کی ہے۔ ایوان میں واضح اکثریت کیلئے ری پبلکنز کو مزید سات نشستیں درکار ہیں۔ صدر جو بائیڈن نے وسط مدتی انتخابات کے ٹرن آؤٹ پر کہاکہ وہ ناقابل یقین حد تک خوش ہیں۔ ریپبلکن پارٹی کو فیصلہ کرنے کی ضرورت ہے کہ وہ کہاں کھڑے ہیں۔