غزہ کے انتظام میں عرب یا بین الاقوامی شراکت قبول ہے، محمود عباس

رام اللہ : فلسطینی صدر محمود عباس نے کہاہےکہ غزہ کا انتظام چلانے کے لیے عرب ممالک یا بین الاقوامی شراکت قابل قبول ہے۔
سعودی عرب کے العربیہ نیٹ ورک سے گفتگو میں محمود عباس نے کہا کہ اسرائیل فلسطین کو مکمل طور پر تباہ کرنا چاہتا ہے۔ فلسطینی بین الاقوامی فیصلوں پر عمل درآمد کی عدم موجودگی کے عادی ہوچکے ہیں۔ فلسطین سے متعلق اقوام متحدہ کے ہزار فیصلے ہیں، جن میں سے کوئی بھی نافذ نہیں ہوا۔ انہوں نے کہا کہ نیتن یاہو فلسطینی عوام کا صفایا کرنے پر مصر ہے وہ چاہتا ہے کہ وزیر اعظم رہے تاکہ اس کے خلاف مقدمہ نہ چل سکے۔ محمودعباس نے کہا کہ ہم اسرائیل سے جنگ نہیں چاہتے ۔ ہمارا قانون پرامن عوامی مزاحمت پر مبنی ہے۔ حماس کے ساتھ کئی بار مذاکرات کر چکے ہیں مگر نتیجہ نہیں نکلا۔ حماس کو فلسطینی قیادت اور اس کی قانونی ذمہ داریوں کو تسلیم کرنا چاہیے۔ انہوں نے کہا کہ ہم ایک ریاست اور ایک قوم ہیں اور حماس کو ایک ریاست اور ایک ہتھیار کے اصول پر عمل کرنا ہوگا۔