Raza Musani 
لندن : لندن میں اسرائیلی مظالم کیخلاف بڑا احتجاجی مظاہرہ کیا گیا۔ جبکہ پولیس نے فلسطین ایکشن کےحق میں احتجاج پر چارسو پچیس مظاہرین کو گرفتار کرلیا۔
اسٹاپ دی وار اور دیگر جنگ مخالف تنظیموں کے زیرِ اہتمام وسطیٰ لندن میں مظاہرے میں ہزاروں افراد شریک ہوئے۔ جس کا آغاز رسل اسکوائر سے ہوا۔ شرکاء مختلف شاہراہوں سے ہوتے ہوئے وائٹ ہال تک پہنچے۔ مظاہرے کے شرکاء تمام راستے اسرائیل کے خلاف اور فلسطینوں کے حق میں نعرے بلند کرتے رہے۔ مظاہرے میں شریک افراد سے مختلف اراکینِ پارلیمنٹ اور جنگ مخالف تنظیموں کے رہنماؤں نے خطاب کیا۔ مظاہرین کاکہنا تھا کہ برطانیہ اسرائیل کو تمام ہتھیاروں کی فروخت روکے۔ اور اسلحہ فروخت کرنے کے تمام معاہدے منسوخ کرے۔
ادھر پولیس کے انتباہ کے باجود پارلیمنٹ اسکوائر پر سینکڑوں افراد فلسطین ایکشن کے حق میں پوسٹر لے کر جمع ہوئے۔ پولیس نے چار سو سے زائد مظاہرین کو گرفتار کر لیا۔
