اسرائیل کو سزا نہ دی گئی تو عدم استحکام مزید بڑھے گا، اردن

عمان : اردن نے خبردار کیا ہے کہ اگر اسرائیلی ریاست کو اس کی جارحیت کی سزا نہ دی گئی تو خطے میں عدم استحکام کو مزید بڑھاوا ملے گا۔ اردن کے وزیرخارجہ ایمن الصفادی نےبین الاقوامی برادری سے ایک بار اپیل کی کہ غزہ میں شروع کی گئی نئی جارحیت اور خونریزی کے خلاف مضبوط اقدامات کرے۔ انہوں نے مزید کہا کہ غزہ میں جاری بھوک اور قحط کے خاتمے کے لیے فوری، عملی، فیصلہ کن اور مؤثر اقدامات کیے جائیں۔ تاکہ اسرائیل مجبور ہوسکے کہ وہ فلسطینیوں کو خوراک کی ترسیل میں رکاوٹیں ڈالنے سے باز آجائے۔
ایمن الصفادی نے اسرائیلی وزیر اعظم نیتن یاہو پر الزام لگایا کہ وہ اپنے خلاف اسرائیلی عدالتوں میں جاری مقدمات سے بچنے کی خاطر غزہ جنگ کو طول دے رہے ہیں۔ کیونکہ انہیں اپنی سیاسی بقا اب جنگ میں ہی نظر آتی ہے۔ انہوں نے کہا کہ نیتن یاہو غزہ کو بار بار تباہ کررہے ہیں۔ اس وجہ سے امن کی امید بھی ختم ہورہی ہے۔ وہ اپنی جنگی پالیسیوں کے باعث پورے مشرق وسطیٰ کو آگ کی طرف دھکیل رہے ہیں۔