اسرائیلی فورسز مزاحمت کو دبانے میں ناکام ہوگئی، حماس

غزہ : فلسطین کے مزاحمتی گروپوں نے مغربی کنارے میں صیہونیوں کے خلاف کامیاب کارروائی کو سراہتے ہوئے اسے بہادرانہ آپریشن قرار دیا ہے۔ اور واضح کیا ہے کہ صیہونی سیکیورٹی فورسز مزاحمت کو دبانے میں ناکام ہوگئی ہیں۔ حماس کے ترجمان عبداللطیف القانو نے کہا کہ یہ آپریشن فلسطینی عوام کی انقلاب کو جاری رکھنے اور مسجد اقصیٰ کو روزانہ کی جارحیت سے بچانے کی صلاحیت کو ظاہر کرتا ہے۔ فلسطینیوں کے خلاف مسلسل جارحیت اور مسجد اقصیٰ پر روزانہ حملے کا مقابلہ مزاحمتی حملوں میں توسیع سے کیا جائے گا۔ انہوں نے کہا کہ حالیہ کارروائی اسرائیلی سیکیورٹی فورسز کی مزاحمت کاروں کو کچلنے میں ناکامی کی علامت ہیں۔ قاسم نے کہا کہ مختلف شکلوں میں مزاحمتی کارروائیوں میں اضافہ قبضے کے لیے ایک واضح پیغام ہے کہ اس کے خطرات ہمیں کمزور نہیں کرسکتے بلکہ یہ ہمارے عزم وحوصلہ میں اضافہ کریں گے اور انہیں قبضے کو چیلنج کرنے کے لیے مزید آمادہ کریں گے۔ اسلامی جہاد نے بھی کارروائی کا خیرمقدم کیا اور کہاکہ یہ اقدام فلسطینیوں کے خلاف بڑھتے ہوئے جرائم کا فطری اور جائز ردعمل ہے۔ یہ حملہ فلسطینیوں کا مکمل طاقت کے ساتھ مزاحمت جاری رکھنے کے عزم کو واضح کرتا ہے۔