جنگ ہوئی تو حزب اللہ یومیہ دو ہزار میزائل برسائے گی، سابق صیہونی عہدیدار

تل ابیب: صیہونی خفیہ ایجنسی کے سابق اعلی عہدیدار جیک نیریا نے کہا ہے کہ حزب اللہ اور صیہونی حکومت کے درمیان جنگ چھڑنے کی صورت میں لبنانی تنظیم اسرائیل پر روزانہ 2000 میزائل فائر کرے گی۔ مقاومتی تنظیم نے مقبوضہ فلسطین کے شمالی علاقے الجلیل میں نفوذ حاصل کیا ہے جوکہ صیہونی حکومت کے لئے کسی بھی طور پر خوش آئند نہیں ہے۔ اس علاقے میں نفوذ پیدا کرنے کی وجہ سے اسرائیل کا بڑا حصہ حزب اللہ کی دسترس میں آگیا ہے۔ انہوں نے کہا کہ حزب اللہ نے 2011 سے ہی اس علاقے میں نفوذ کی کوششوں کا آغاز کیا تھا۔ اس علاقے میں جنگ ہوجائے تو حزب اللہ کے خصوصی دستے رضوان مستقبل کی جنگ میں اہم کردار ادا کرسکتا ہے۔ انہوں نے مزید کہا کہ ایران مختلف مقاومتی تنظیموں کے درمیان رابطے بڑھاکر اسرائیل کے خلاف گھیرا تنگ کرنا چاہتا ہے۔