بھارت میں سرکاری عہدیدار مسلمانوں پر کھلے عام تشدد کررہے ہیں، ایمنسٹی ہیومین رائٹس واچ

لندن : حقوق انسانی کی تنظیموں ہیومین رائیٹس واچ اور ایمنسٹی انٹرنیشنل نے ہندوستان میں مسلمانوں کو سرعام سزاؤں اور امتیازی سلوک کی شدید الفاظ میں مذمت کی ہے۔ہیومین رائٹس واچ نے کہا ہے کہ ہندوستان کے کئی صوبوں میں سرکاری عہدیدار مسلمانوں کے خلاف ایک طرح کی سرسری سزا کیلئے تشدد کررہے ہیں۔ قانون کی حکمرانی نظر انداز کرنے والے اہلکار عوام کو یہ پیغام دے رہے ہیں کہ مسلمانوں کے ساتھ امتیازی سلوک کیا جا سکتا ہے اور ان پرحملہ کیا جا سکتا ہے۔ ہندوتوا تنظیم بھارتیہ جنتا پارٹی کے زیرحکومت متعدد صوبوں میں سرکاری عہدیداروں نے کسی قانونی جواز کے بغیر مسلمانوں کے گھر اور جائیدادیں منہدم کردیں۔ حال ہی میں سرعام ہندوتہوارمیں خلل اندازی پر ایک مسلمان کو کوڑے لگائے گئے۔ ایمنسٹی انٹرنیشنل نے پولیس کے مسلمان مردوں کو کوڑے مارنے کی مذمت کی ہے اور اسے انسانی حقوق کی سنگین خلاف ورزی اور قانون کی سراسر بے عزتی قرار دیا ہے۔ پولیس نے قانونیت، ضرورت، تناسب اور جوابدہی کے رہنما اصولوں کو صریحاً نظر انداز کر دیا۔