جی ایچ ایف اسرائیلی انٹیلی جنس فرنٹ کے طور پر کام کررہی ہے، غزہ حکام

غزہ : غزہ کی وزارت داخلہ نے اسرائیلی و امریکی حمایت یافتہ غزہ ہیومینٹیرین فاؤنڈیشن کو اسرائیل کا انٹیلی جنس فرنٹ قرار دیتے ہوئے خبردار کیا ہے کہ شہری جی ایچ ایف کو کسی قسم کی ذاتی معلومات فراہم نہ کریں۔ غزہ کی وزارت داخلہ نے کہا ہے کہ جی ایچ ایف انسانی امداد کی آڑ میں اسرائیل کے سیکیورٹی اور انٹیلی جنس فرنٹ کے طور پر کام کررہی ہے۔شہری امداد حاصل کرنے کیلئے جی ایچ ایف کے اہلکاروں کو اپنا ذاتی ڈیٹا، تصاویر یا معلومات قطعی فراہم نہ کریں۔ وزارت داخلہ نےکہاکہ امداد کی تقسیم کے لیے جی ایچ ایف نے جس نئے نظام کا اعلان کیا ہے اس کا مقصد اپنی انٹیلی جنس جمع کرنے کی کارروائیوں کو جواز فراہم کرناہے۔ نئے نظام کے تحت خاندانوں کی رجسٹریشن۔ ذاتی ڈیٹا فراہم کرنے اور منفرد نمبر والے شناختی کارڈ کے لیے ان کی تصویر لینے کی ہدایت کی گئی ہے۔