لیبیا میں سیلاب سے ہلاکتوں کی تعداد 11 ہزار سے تجاوز، ہلال احمر

طرابلس: لیبیا میں ہلال احمر نے تصدیق کی ہے کہ سیلاب سے ہلاکتوں کی تعداد گیارہ ہزار سے تجاوز کرگئیں ہیں جب کہ لاپتہ افراد کی تعداد 20 ہزار تک پہنچ گئی ہے۔ ہلال احمر کا کہنا ہے کہ سیلاب سے 2000 لاشیں سمندر میں بہہ گئی ہیں۔ درنا میں امدادی کاموں کے دوران لاشیں ملنے کا سلسلہ جاری ہے۔ ہر طرف بچوں، بڑوں اور خواتین کی لاشیں نظر آ رہی ہیں۔ مردہ خانے بھی بھرے پڑے ہیں۔ 30 ہزار افراد بے گھر ہو چکے ہیں۔ جنہیں شہر سے باہر محفوظ مقامات پر منتقل کر دیا گیا ہے۔ سڑکیں اور مواصلاتی نظام تباہ ہونے سے امدادی ٹیموں کو شدید مشکلات درپیش ہیں۔ سینکڑوں لاشوں کو اجتماعی قبروں میں سپرد لحد کردیا گیا۔ بین الاقوامی امدادی اداروں سے لاشوں کی تدفین کیلئے بیگ فراہم کرنے کی اپیل کی گئی ہے۔