اماراتی تھنک ٹینک کی اسرائیل کیلئے فضائی حدود بند کرنے کی تجویز

ابو ظہبی : عرب امارات کے تھنک ٹینک الحبطور ریسرچ سینٹر نے اسرائیل کو سبق سکھانے کیلئے فضائی حدود بند کرنے کی تجویز دیدی۔ الحبطور ریسرچ سینٹر نے کہاہےکہ مربوط فضائی ناکہ بندی سے اسرائیلی معیشت کے متعدد شعبوں میں شدید نقصان پہنچے گا۔ اور اس کا جی ڈی پی 4.8 اور 5.7 فیصد تک سکڑ جائے گا جو کساد بازاری کو متحرک کرے گا۔
رپورٹ میں کہا گیاہے کہ ترکیہ، پاکستان اور انڈونیشیا جیسے ممالک سمیت وسیع پیمانے پر ناکہ بندی اسرائیل کے مشرق اور جنوب کے لیے براہ راست پروازیں منقطع کر دے گی، جس سے ایشیا اور افریقہ کی منڈیوں تک رسائی میں اہم رکاوٹ پیدا ہو گی۔ رپورٹ کے مطابق پروازوں میں چار سے چھ گھنٹے طویل راستے سے ہر پرواز پر تیس سے ساٹھ ہزار ڈالر اضافی خرچہ آئے گا۔اسرائیلی ایئر لائن کوممکنہ طورپر 60 سے 75 فیصد کےدرمیان آمدنی میں کمی کاسامنا کرنا پڑے گا۔