بحرین میں انتخابی ڈرامہ ناکام، ٹرن آؤٹ 28 فیصد سے بھی کم

مناما : بحرین میں قابض آل خلیفہ حکومت کا انتخابی ڈرامہ ناکام ہوگیا۔ عوام بائیکاٹ کی اپیل پر عمل کرتے ہوئے پولنگ اسٹیشن سے دور رہے۔ جس کی وجہ سے ٹرن آؤٹ 28 فیصد سے بھی کم رہا۔ تاہم حکام 73 فیصد ٹرن آؤٹ کا دعویٰ کررہے ہیں۔ ووٹنگ کے اختتام پر بحرین کی سب سے بڑی سیاسی جماعت جمعیت الوفاق نے کہا کہ عوام نے انتخابات میں بھر پور طریقے سے شرکت نہ کر کے دکھا دیا کہ وہ آل خلیفہ حکومت کو نہیں چاہتی اور 28 فیصد سے بھی کم ٹرن آوٹ اس کی زندہ مثال ہے ۔ آیت الله شیخ عیسیٰ قاسم نے انتخابات میں عوامی شرکت کو خیانت قرار دے دیتے ہوئے کہا تھا کہ ملک کی پارلیمنٹ، حکومت کے فائدے اور عوام کے نقصان میں ہے، کیوں کہ یہ پارلیمنٹ عوام پر ظلم و ستم اور عوام کو دیوار سے لگانے کے ہتھیار میں بدل گئی ہے۔ پارلیمنٹ کے ایوان زیریں کی 40 نشستوں کے لیے 561 اور بلدیاتی کونسلز کی 30 نشستوں کیلئے 176 امیدواروں نے حصہ لیا۔