شام میں فوجی اکیڈمی پر ڈرون حملہ، 100 افراد جانبحق، 240 زخمی

دمشق: شام کے شہر حمص میں ملٹری کالج پر ڈرون حملے نے تباہی مچا دی۔ حملے میں سو افراد جانبحق اور 240 زخمی ہوگئے۔
شامی حکومت کے مطابق بارود سے لدے ڈرون نے فوجی اکیڈمی کے افسران کی گریجویشن تقریب کو نشانہ بنایا۔ حملہ اس وقت کیا گیا جب تقریب اختتام کے قریب تھی۔ دھماکے سے اکیڈمی میں افراتفری مچ گئی اور ہرطرف لاشیں اور زخمی بکھر گئے۔ شامی فوج نے حملے کا ذمہ دار دہشت گرد تنظیموں کو قرار دیا ہے۔ فوج نے اس حملے کا پوری قوت سے جواب دینے کے عزم کا بھی اظہار کیا۔ ہلاک شدگان میں فوجیوں کے علاوہ شہری بھی شامل ہیں۔ کئی زخمیوں کی حالت نازک بتائی جاتی ہے۔ برطانیہ میں قائم سیریئن آبزرویٹری فار ہیومن رائٹس کا کہنا ہے کہ مرنے والوں میں نصف سے زائد تعداد فوجی محافظین کی ہے۔ شامی حکومت نے آج سے ملک میں تین روزہ سوگ کا اعلان کیا ہے۔ فوری طور پر کسی تنظیم کی جانب سے اس حملے کی ذمہ داری قبول نہیں کی گئی۔