صحافیوں کے قتل عام پر سلامتی کونسل کا اجلاس بلانے کا مطالبہ

جنیوا: جنگ اور آفت زدہ علاقوں میں طبی امداد پہنچانے والی بین الاقوامی تنظیم رپورٹرز ود آؤٹ بارڈرز (آر ایس ایف) نے غزہ میں صحافیوں کے قتل عام پر سلامتی کونسل کا ہنگامی اجلاس بلانے کا مطالبہ کردیا۔
آر ایس ایف نے ایک بیان میں کہا ہے کہ اسرائیل جان بوجھ کر صحافیوں کو نشانہ بناتا ہے۔ دو سال میں اسرائیلی فورسز کے ہاتھوں دو سو سے زائد صحافی مارے جاچکے ہیں۔ بیان میں سوال کیا گیاہےکہ اسرائیلی فوج غزہ سے معلومات کو ختم کرنے کی اپنی بتدریج کوششوں میں کہاں تک جائے گی؟۔
ادھر اقوام متحدہ کی نمائندہ فرانسسکا البانیز نے کہاہے کہ ناصر اسپتال پر حملے میں شہید صحافی کا کیمرہ غزہ میں نسل کشی کے متاثرین کی یادگار میں نمائش کے لیے پیش کیا جانا چاہیے۔ البانیز نے کہا کہ تمام صحافیوں کے لیے شرم کی بات ہے کہ وہ نسل کشی کی دستاویز کرتے ہوئے اپنے بہادر فلسطینی ساتھیوں کے قتل عام کے خلاف آواز نہیں اٹھا رہے ہیں۔