Raza Musani 
ایران نے پابندیوں کا اسنیپ بیک میکنزم فعال کرنے پر برطانیہ۔ فرانس اور جرمنی پر مشتمل ای تھری ممالک کو سخت نتائج سے خبردار کیا ہے۔ ایرانی وزیر خارجہ عباس عراقچی نے سوشل میڈیا پلیٹ فارم ایکس پر ایک پوسٹ میں ای تھری ممالک کو خبردار کرتے ہوئے لکھا ہے کہ اسنیپ بیک میکانزم کو متحرک کرنے سے وہ اپنا باقی ماندہ آخری کارڈ بھی کھو دیں گے۔
انہوں نے کہا کہ ای تھری ممالک قانونی، سیاسی، یا اخلاقی بنیادوں پر اسنیپ بیک بحال کرنے کی درخواست کرنے کے حقدار نہیں ہیں۔ ایرانی وزیر خارجہ نے کہا کہ صحیح تشریح یہ ہے کہ اسنیپ بیک استعمال کریں اور اسے گنوا دیں یا زیادہ بہتر بات یہ ہے کہ اسے استعمال کریں اور سب کچھ کھو دیں۔
گذشتہ روز ایرانی پارلیمنٹ کی قومی سلامتی اور خارجہ پالیسی کی کمیٹی کے سربراہ ابراہیم عزیزی نے بھی ان ممالک کو متنبہ کیا کہ اسنیپ بیک میکانزم کو متحرک کیا تو تہران ممکنہ طور پر جوہری عدم پھیلاؤ کے معاہدے این پی ٹی سے دستبردار ہوجائے گا۔
