صیہونی فوج کے حملے، 24 گھنٹوں میں 52 فلسطینی شہید، متعدد زخمی

غزہ : صیہونی فوج نے غزہ پر اپنی بے دریغ بمباری کا سلسلہ جاری رکھا ہوا ہے۔ چوبیس گھنٹوں کے دوران فضائی اور زمینی حملوں میں مزید باون فلسطینی شہید اور درجنوں زخمی کردئے گئے۔ صیہونی فوج نے رات گئے المواصی میں بے گھر فلسطینیوں کی خیمہ بستی پر بم برسادئے جس کے نتیجے میں اٹھارہ فلسطینی شہید ہوگئے۔
غزہ سٹی میں الشافعی اسکول پر حملے میں پانچ فلسطینی شہید اور کئی زخمی ہوئے۔ البریج پناہ گزین کیمپ پر حملے میں دو۔ المغازی میں مکان پر حملے میں تین اور خان یونس میں باپ بیٹا شہید کردئے گئے۔ جبالیہ۔ المواصی۔ بیت حنون ۔ بیت لاہیہ ۔ غزہ سٹی اور دیگر علاقوں پر بھی فضائی اور زمینی حملے کئے گئے۔
اکتوبر 2023 سے غزہ پر جاری اسرائیلی جارحیت کے نتیجے میں اب تک کم از کم 57 ہزار 200 فلسطینی شہید اور ایک لاکھ پینتیس ہزار سے زائد زخمی ہو چکے ہیں۔